225. EXPLICATIO. (Vers. 1.) "Post haec vidi, et ecce ostium apertum in Caelo," significat manifestationem de ordinatione caelorum ad Ultimum Judicium a Domino, futurum secundum Divina Ipsius vera in Verbo. - Per "ostium apertum" cum de Caelo, significatur intromissio, ut supra (n. 176); hic etiam manifestatio, quia dicit, "Vidi et ecce;" et quia tunc visa sunt quae in hoc capite memorantur, quae sunt de ordinatione Caelorum ad Ultimum Judicium a Domino, futurum secundum Divina Ipsius vera in Verbo, ideo per "Vidi (et) ecce ostium apertum in Caelo," significatur manifestatio de illis.