Conjugial Love (Rogers) n. 395

Previous Number Next Number See English 

395. VIII. Quod Sphaera innocentiae influat in infantes, et per illos in parentes, et afficiat. Quod Infantes sint Innocentiae, notum est, sed quod innocentia illorum influat a Domino, non notum est; influit a Domino, quia Ipse est Ipsa Innocentia, ut mox supra dictum est, nec potest aliquid influere, quia non dari, nisi a suo principio, quod est Ipsum Illud. Qualis autem est Innocentia infantiae, quae afficit parentes, paucis dicetur; elucet illa ex illorum facie, ex aliquibus illorum gestibus, et ex prima illorum loquela, et afficit: innocentia illis est, quia non cogitant ab interiori, nondum enim sciunt quid bonum et malum, ac verum et falsum, ex quibus cogitent; inde illis non est prudentia ex proprio; nec propositum ex deliberato, ita nullus finis mali; non illis est proprium ex amore sui et mundi acquisitum; non sibi quicquam tribuunt; omnia accepta referunt suis parentibus; contenti pusillis quae illis dono dantur; non illis est sollicitudo de victu et amictu; et nulla de futuris; non spectant ad mundum, et inde cupiunt multa; amant suos parentes, suas nutrices, et infantes socios, cum quibus in innocentia ludunt; se patiuntur duci, auscultant et obediunt: haec est Innocentia infantiae, quae est causa amoris, qui vocatur storge.


This page is part of the Writings of Emanuel Swedenborg

© 2000-2001 The Academy of the New Church