110. Vers. 11, 12. Nomen primi Pishon, is circumdans totam terram Havillah, ubi aurum. Et aurum terrae illius bonum; ibi bdellium et lapis shoham. 'Fluvius primus' seu 'Pishon' significat intelligentiam fidei ex amore; 'terra Havillah,' mentem; 'aurum,' bonum; 'bdellium et shoham,' verum; quod aurum bis dicatur, est causa quia significat bonum amoris et bonum fidei ex amore; et quod bdellium et shoham, est quod unum significet verum amoris, alterum verum fidei ex amore. Talis est caelestis homo.