6205. Saepe observatum est quod spiritus mali imprimis induant hominis persuasiones et cupiditates, et cum illas induunt, quod hominem regant ex imperio, nam qui infert se in hominis cupiditates et in ejus persuasiones, is sibi subjicit hominem, et (x)illum sibi servum facit; at influxus per angelos fit secundum hominis affectiones, quas leniter ducunt et flectunt ad bonum et non frangunt; ipse influxus est tacitus, vix perceptibilis, nam est in interiora, et continue per liberum.