7445. `Et ponam redemptionem inter populum Meum et inter populum tuum': quod significet liberationem illorum qui ab Ecclesia spirituali ab illis qui in infernis prope, constat (c)ex significatione `redemptionis' quod sit eductio ab inferno, de qua n. 7205, et quod in specie dicatur de illis qui ex vastatione liberantur, n. 2959; ex repraesentatione `filiorum Israelis,' qui hic sunt `populus Meus,' quod sint qui ab Ecclesia spirituali, de qua supra n. 7439; et ex repraesentatione `Aegyptiorum,' qui hic sunt `populus tuus,' quod sint illi qui in infernis prope et infestant, de qua n. 7090; inde patet quod per `ponam redemptionem inter populum Meum et populum tuum' significetur liberatio illorum qui ab Ecclesia spirituali ab illis qui in infernis prope.