8220. Vers. 26-28. Et dixit Jehovah ad Moschen, Extende manum tuam super mare, et revertantur aquae super Aegyptios, super currus illius, et super equites illius. Et extendit Moscheh manum suam super mare, [et reversum est mare] ad vergere mane, ad vim fluxus sui, et Aegyptii fugientes obviam ei, et excussit Jehovah Aegyptios in medium mare. Et reversae sunt aquae, et obtexerunt currus et equites, ad omnem exercitum Pharaonis, venientes post illos in mare, non relictus est in illis usque ad unum. `Et dixit Jehovah ad Moschen' significat influxum: `Extende manum tuam super mare' significat dominium potentiae veri Divini super infernum: `et revertantur aquae super Aegyptios' significat quod falsa [ex malo] redundarent ad illos, et circumfunderent illos qui in falsis (c)a malo sunt: `super currus illius, et super equites illius' significat doctrinalia falsi, ac ratiocinia ex intellectuali perverso: `et extendit Moscheh manum suam super mare' significat, ut supra: dominium potentiae Divinae super infernum: `et reversum est mare ad vergere mane, ad vim fluxus sui' significat redundationem falsorum ex malo ad illos, ex praesentia Domini: `et Aegyptii fugientes obviam ei' significat quod (x)ipsi se falsis ex malo immergerent: `et excussit Jehovah Aegyptios in medium mare' significat quod sic ipsi conjecerint se in infernum ubi falsa ex malo: `et reversae sunt aquae' significat relapsum falsorum in illos: `et obtexerunt currus et equites, et omnem exercitum Pharaonis' significat quod absconderent illos falsa sua: `venientes post illos in mare' significat quod occuparent illos: `non relictus est in illis usque ad unum' significat omnes et singulos.