5324. Primum per ventum orientalem, qui missus primum per meridionalem tractum, et pergebat ad occidentalem, usque demum ad terminum qui in medio occidentali tractu, auferebatur montanum supra, quod tegebatur usque dum primum submontanum appareret denudatum, et tunc apparebat quale id subterraneum esset, quod nempe plenum palatiis et monasteriis, circa hiatum de quo supra nihil apparebat quam aliquod obscurum, postea in meridionali illo tractu divites absque monasteriis magno numero, sic ut quasi totus ille tractus esset aedificatus subter; tractus dein usque ad occidentale confinium, et inde ad terminum medium in occidente, erant monasteria magnifica ingenti numero.