8592. Vers. 8, 9. Et venit Amalek, et pugnavit cum Israele in Rephidim. Et dixit Moscheh ad Joschuam, Elige nobis viros, et exi, pugna in Amalek; cras ego consisto super capite collis, et baculus Dei in manu mea. `Et venit Amalek' significat falsum ex interiore malo: `et pugnavit cum Israele in Rephidim' significat quod aggressi cum (t)tentationem gravem sustinebant: `et dixit Moscheh ad Joschuam' significat influxum Divinum in verum pugnans: `Elige nobis viros' significat ut vera in pugnam instruat: `et exi, pugna in Amalekum' significat contra falsa ex interiore malo: `cras ego consisto super capite collis' significat conjunctionem veri Divini cum bono charitatis, et inde influxum: `et baculus Dei in manu mea' significat quod inde potentia.